Baixe o app para aproveitar ainda mais
Prévia do material em texto
TESE DE DOUTORAMENTO VIOLENCIA, PERSECUCIÓNS E RELATO NA CONFORMACIÓN DO PODER GOLPISTA EN SANTIAGO DE COMPOSTELA, 1936 Rafael García Ferreira ESCOLA DE DOUTORAMENTO INTERNACIONAL DA UNIVERSIDADE DE SANTIAGO DE COMPOSTELA PROGRAMA DE DOUTORAMENTO EN HISTORIA CONTEMPORÁNEA SANTIAGO DE COMPOSTELA ANO 2021 Declaración do autor da tese Violencia, persecucións e relato na conformación do poder golpista en Santiago de Compostela, 1936 D. Rafael García Ferreira Presento a miña tese, seguindo o procedemento axeitado ao Regulamento, e declaro que: 1) A tese abarca os resultados da elaboración do meu traballo. 2) De ser o caso, na tese faise referencia ás colaboracións que tivo este traballo. 3) Confirmo que a tese non incorre en ningún tipo de plaxio doutros autores nin de traballos presentados por min para a obtención doutros títulos. 4) A tese é a versión definitiva presentada para a súa defensa e coincide a versión impresa coa presentada en formato electrónico. En Santiago de Compostela, 12 de xullo de 2021. Asdo. Rafael García Ferreira Autorización dos directores da tese Violencia, persecucións e relato na conformación do poder golpista en Santiago de Compostela, 1936 D. Lourenzo Fernández Prieto D. Antonio Míguez Macho Informan: Que a presente tese, correspóndese co traballo realizado por D. Rafael García Ferreira, baixo a nosa dirección, e autorizamos a súa presentación, considerando que reúne os requisitos esixidos no Regulamento de Estudos de Doutoramento da USC, e que como director/titor desta non incorre nas causas de abstención establecidas na Lei 40/2015. En Santiago de Compostela, 12 de xullo de 2021 Asdo. Lourenzo Fernández Prieto e Antonio Míguez Macho Resumo Esta disertación está relacionada co golpe de Estado de xullo de 1936 na cidade de Santiago de Compostela e con como se afianzaron os novos poderes a través do uso da violencia por diferentes vías. Por unha parte, estúdase a conspiración e o golpe de Estado en si, como acto de forza para desprazar ás autoridades e tomar o poder. Posteriormente, analízanse as diferentes formas de violencia e persecución que se puxeron en marcha contra unha parte da sociedade, e que tiñan como obxectivo consolidar ese poder: asasinatos, denuncias, depuracións.... Estúdanse tanto os procesos como a responsabilidade nestas accións e en que medida uns e outros tiveron participación nelas. Finalmente, analízanse os diferentes espazos que actuaron como lugares de violencia e a súa relación con vítimas e verdugos, dándolle unha dimensión e un punto de vista máis a todos os procesos que se analizan. Palabras chave: golpe de Estado, Santiago de Compostela, violencia, persecución, relato. Resumen Esta disertación está relacionada con el golpe de Estado de julio de 1936 en la ciudad de Santiago de Compostela y en cómo se afianzaron los nuevos poderes a través del uso de la violencia por diferentes vías. Por una parte, se estudia la conspiración y el golpe de Estado en si, como acto de fuerza que desplaza a las autoridades y toma el poder. Posteriormente, se analizan las diferentes formas de violencia y persecución que se pusieron en marcha contra una parte de la sociedad, y que tenían como objetivo consolidar ese poder: asesinatos, denuncias, depuraciones... Se estudian tanto los procesos como las responsabilidades en estas acciones y en que medida unos y otros participaron en ellas. Finalmente, se analizar los diferentes espacios que actuaron como lugares de violencia y su relación con las víctimas y verdugos, dando una dimensión y un punto de vista más a todos los procesos que se analizan. Palabras clave: golpe de Estado, Santiago de Compostela, violencia, persecución, relato. Abstract This dissertation is relates with the coup d’etat of July of 1936 in the city of Santiago de Compostela and how the new powers are consolidated through the use of violence in different ways. On the one hand, we study the conspiration and the coup itself, as the act of force that displaces the authorities and seizes power. Subsequently, the different forms of violence and persecution that were launches against a part of the society are analyzed, and whose objective was to consolidate that power: murders, complaints, purges… Both the processes and the responsibilities in the actions are studied; who participates on that processes is studied as well. Finally, the different spaces that worked as sites of violence and their relationship with victims and executioners are analyzed, giving a further dimension and anther point of view to all the processes that are studied here. Key words: coup d’etat, Santiago de Compostela, violence, persecution, legend Limiar Este texto é o resultado dun traballo que deu comezo hai xa varios anos, cando decidín embarcarme nel tras finalizar os meus estudos de mestrado en Historia Contemporánea. Tomei a decisión de comezar coa carreira investigadora grazas ao impulso dos meus achegados, que creron na miña capacidade para sacar adiante este proxecto dende o primeiro momento, e que seguramente tiveron moitas menos dúbidas ca min da miña capacidade. A tese doutoral que segue foi un proceso que, sen o apoio de todos eles, quizais non tería saído adiante. Por iso me gustaría ter un especial recordo, en forma de sincero agradecemento, por toda a axuda que se me ten prestado ao longo dos últimos anos. En primeiro lugar, os meus compañeiros do grupo HISTAGRA, cos que compartín grupo de investigación e inquedanzas ao longo do proceso. De entre estes, por suposto, Antonio Míguez Macho e Lourenzo Fernández Prieto, por ter sido mestres primeiro e directores desta tese doutoral posteriormente, aconsellándome e guiándome durante todo o proceso. Grazas tamén pola paciencia. A Gustavo, polos consellos e polo seu imprescindible traballo no grupo, que tanto nos axuda a todos. E a Conchi e Uxía, coas que tantas inquedanzas compartín. A todos os meus amigos, que de tanto apoio me serviron en diferentes fases e por diferentes motivos. Aos que estiveron e aos que xa non, pois estou seguro de que nalgún momento todos foron importantes. Aos que levan máis tempo e aos que menos, pois todos me apoiaron de igual forma e valoraron en todo o momento o que facía, aínda cando non o entendían de todo. Precisamente por iso llo agradezo especialmente. Aqueles aos que valoro e sei que me valoran saberán apreciar estas verbas, de igual forma que eu valoro a súa amizade. Á miña familia, que en ningún momento dubidou de min ao longo do traxecto. Deles contei co seu apoio e ánimo en todos os aspectos e en todo momento. De entre todos non podo deixar de destacar a meu pai e a meu irmán, os máis próximos e os que máis tiveron que ver con toda a axuda que podía precisar do ámbito familiar, e que espero que estean orgullosos deste traballo. E, con especial agarimo, quero acordarme da miña nai, á que estou seguro que lle produciría unha gran ledicia e que a faría moi feliz ver que cheguei ata aquí. A vida, en ocasións, é como unha partida de damas. Cruzámonos con moitas fichas, como non nos cruzamos con outras, tentando chegar ao final. Non sempre é sinxelo e podemos cometer erros, pero tamén ter moitos acertos. Pero no fondo, o importante é atopar a alguén con quen xogar. Alguén a quen lle guste deixar todas as súas damas na fila de atrás. Índice Introdución ............................................................................................................................................... 19 Fontes documentais e metodoloxía ................................................................................................... 29 Estado da cuestión..................................................................................................................................39 Marco teórico ........................................................................................................................................... 47 Obxectivos e estrutura do texto .......................................................................................................... 59 A Compostela republicana, 1931-1936 ............................................................................................... 63 1. Conspiración e golpe de Estado en Santiago de Compostela ............................................... 71 1.1. A «conspiración» en Santiago de Compostela ............................................................... 73 1.1.1. A conspiración no cuartel do Hórreo .............................................................................. 73 1.1.2. O suposto apoio da dereita local: un relato dos golpistas ........................................ 78 1.1.3. A actividade da Falanxe na primavera de 1936 ............................................................ 84 1.1.4. Conspiración en Santiago de Compostela? .................................................................. 88 1.2. O golpe de Estado militar ......................................................................................................... 90 1.2.1. A defensa da legalidade republicana a través do Comité de Defensa da República .............................................................................................................................................................. 91 1.2.2. O golpe dende o cuartel do Hórreo ................................................................................ 97 1.2.3. A participación da Garda civil ........................................................................................ 102 1.2.4. O control militar da cidade ............................................................................................. 103 1.3. Algunhas conclusións arredor do golpe de Estado en Santiago de Compostela .... 106 1.4. Alén do golpe de Estado. Sobre o expediente practicado a Bermúdez de Castro.. 108 2. As causas militares. Persecución e relato .................................................................................. 115 2.1. Os datos das causas militares de Santiago de Compostela ........................................... 115 2.2. As causas como construtoras da culpabilidade. O caso da causa 231/36 ................ 119 2.3. As causas como construtoras do relato golpista .............................................................. 133 2.3.1. O estado de guerra como piar da xustiza militar ...................................................... 133 2.3.2. A construción do relato nas causas militares............................................................. 136 2.3.3. Da «incompatibilidade de xurisdición» á «xustiza ao revés»: os argumentos das defensas ........................................................................................................................................... 143 2.4. Quen é quen nunha causa militar? ...................................................................................... 148 2.4.1. Un perfil das vítimas mortais .......................................................................................... 149 2.4.2. Os verdugos e a responsabilidade compartida ......................................................... 160 2.4.3. Informantes e testemuñas ............................................................................................... 169 3. A implicación na violencia dos poderes locais golpistas ...................................................... 175 3.1. A Delegación de orde pública ............................................................................................... 176 3.2. O novo goberno local golpista de Santiago ....................................................................... 181 3.2.1. O establecemento do poder municipal: xullo-novembro de 1936 ........................ 181 3.2.2. Análise da Delegación civil e comisións xestoras .................................................... 187 3.3. As implicacións na persecución: a depuración do corpo de empregados municipais ................................................................................................................................................................ 195 3.4. As milicias ................................................................................................................................... 210 3.5. A lóxica dos asasinatos sen formación de causa no golpe de Estado ....................... 215 4. Espazos para o golpe, espazos para a violencia ...................................................................... 227 4.1. A espacialidade no golpe de Estado .................................................................................... 227 4.2. Os espazos da violencia .......................................................................................................... 231 4.2.1. Os itinerarios de violencia: reclusión, execución e enterramento ....................... 231 4.2.2. Os espazos de reclusión en Santiago de Compostela ............................................. 235 4.3. O persoal das prisión municipal e central de Santiago de Compostela .................... 263 4.4. A ocupación do espazo público no golpe de Estado ...................................................... 268 4.5. Algunhas consideracións finais sobre os espazos no golpe ......................................... 277 Conclusións ............................................................................................................................................ 281 Fontes consultadas ............................................................................................................................... 291 Bibliografía ............................................................................................................................................. 299 This kind of think is frightening to me, because it often gives me the feeling that the very concept of objective truth is fading out of the world. After all, the chances are that those lies, or at any rate similar lies, will pass into history. How will the history of the Spanish war be written? If Franco remains in power his nominees will write the history books (...). But suppose Fascism is finally defeated and some kind of democratic Government restored in Spain in the fairly near future; even then, how is the history of the war to be written? What kind of records will Franco have left behind him? George Orwell, Visions of a Totalitarian Future, 1942 Introdución 19 Introdución O golpe de Estado de xullo de 1936 e a posterior guerra civil son, probablemente, os dous acontecementos que teñen suscitado máis debates, investigacións e publicacións con respecto á Historia Contemporánea de España. A produción científica e literaria ao redor de ambos é inxente e foi tratada por numerosos investigadores, dende toda clase de perspectivas e con diferentes resultados segundo a óptica coa que se ten tratado. O afán por relatar que ocorreu dende o 17 e 18 de xullo do ano 36 aparece dende os anos posteriores, en base a determinados intereses e en forma de crónicas que debuxaban a sublevación como un movemento salvador do país, establecendo un discurso que xa se viña forxando dende o primeiro momento polos golpistas e que, en moitas ocasións, chega aínda con moita forza ata os nosos días. Investigadores foráneos comezaron a afondar nos feitos dende antes de que a ditadura chegara á súa fin na década dos setenta; e dende entón a investigación e produción de todo tipo de obras sobre o acontecido ten sido unha constante que chega ata os nosos días. O antigo departamento de Historia Contemporánea-actual área de Contemporánea dentro do unificado departamento de Historia- da Universidade de Santiago de Compostela contaba cunha longa tradición de estudos de Historia agraria, inaugurada no seu día polo mestre Ramón Villares, no que diversos investigadores desenvolvían as súas investigacións ao redor do mundo e sociedades rurais, dende diferentes perspectivas e con diferentes marcos, pero adscritos a aquela tendencia investigadora que tanta produción científica ten abrigado baixo o seu paraugas. Sen embargo, dende mediados da década dos noventa foron impulsados programas de investigación centrados na ditadura que se viron concretados en diferentes traballos, tesinas e teses doutorais que abarcaban temáticas, en moitos casos, asociadas aínda ao mundo rural, facendo forte a tradición de estudos previa. Nun contexto como este, a chegada do ano 2006 e a declaración deste como o Ano da Memoria, unido á posta en marcha do Proxecto Interuniversitario Nomes e Voces, deu un novo empuxe aos estudos do departamento, impulsada fundamentalmente por Lourenzo Fernández Prieto, ao redor do golpe de Estado e que iría, co paso do tempo, moito máis alá da contaxe de vítimas que propoñía inicialmente o propio proxecto. Esta tese doutoral enmárcase neste contexto. Orixinalmente partía dun traballo de fin de mestrado que xa comezaba a analizar a persecución e a violencia golpista na cidade de Santiago de Compostela. As apreciacións do tribunal que o xulgou e o impulso dos que son directores deste traballo -o mesmo Fernández Prieto e Antonio Míguez Macho-, acabaron por decidir que a investigación se desenvolvese de xeito máis profundo e que se convertese nunha tese doutoral, no resultado de anos de investigación, debates e traballo conxunto, e resultado tamén desa nova traxectoria de estudos dentro do departamento. Outros verán a luz tamén moi pronto, amosando Rafael García Ferreira 20 a boa dinámica de traballo que se estableceu no seu do grupo de investigación Histagra, pero sobre todo amosando uns resultados froito dun extenso traballo con fontes, realizado con rigor e coa calidade propia da tradición deste departamento da Universidade de Santiago. Ir máis alá das vítimas supón enfrontarse a toda unha serie de discursos e relatos establecidos dende o mesmo ano 1936 polos golpistas e os seus colaboradores. Supón penetrar en todo tipo de procesos nos que se contan as cousas dun xeito específico e en base a un discurso do que non sempre é sinxelo afastarse, co obxectivo de interpretar a realidade en termos e cunha linguaxe democrática. Caer na linguaxe e nas lóxicas dos golpistas é moi sinxelo, porque imperaron tras unha vitoria en guerra civil -en territorios como o galego dende moito antes, debido ao triunfo do golpe- , durante case corenta de ditadura e, nos nosos día, máis de corenta anos de democracia. Estudar o golpe de Estado supón afondar na maraña terminolóxica e terxiversadora dos feitos que se forxou dende o primeiro minuto, e que estableceu toda unha serie de mitos que en moitas ocasións aínda imperan e contaminan moitas das obras ao respecto. O traballo coas fontes e a inmersión en documentación como as causas militares significa confrontar e contrastar discursos que estarán vixentes durante décadas e dos que nos debemos afastar para ver con outros ollos o que ocorreu en realidade. Afondar no coñecemento histórico e derrubar mitoloxías e discursos que se veñen presupoñendo, incluso dentro da propia historiografía, é máis que posible; que o coñecemento acabe sendo permeable ao conxunto da sociedade, necesario. Así se veu facendo para demostrar que certos apriorismos que se deron por sentados con respecto á Galicia contemporánea -e non so a contemporánea- non eran tan certos como sempre se dixo. Véxanse, sen ir máis lonxe, os traballos de Lourenzo Fernández sobre o mundo labrego e os de Antonio Míguez sobre o movemento obreiro galego, pero tamén os de Miguel Cabo para a cuestión do asociacionismo agrario ou, noutras cronoloxías, os de Xosé Miguel Andrade ou Isidro Dubert.1 Demostrado está tamén con respecto ao golpe de Estado e á ditadura franquista, así como en relación a todos os relatos que se foron conformando debido á vitoria na guerra, e que tamén veñen sendo sometidos a estudo e a critica, e desmontados grazas a sólidos traballos que amosan unha realidade histórica moi diferente á que se estableceu dende 1936.2 Unha base de estudos A inauguración dos estudos sobre o golpe, a guerra e a ditadura que se desenvolveron dende o ano 2006 coa inauguración do Proxecto Nomes e Voces ten culminado nunha serie de obras colectivas que viñeron sentando as bases para que esta investigación fora tomando forma ata a súa 1 Lourenzo Fernández Prieto, Labregos con ciencia. Estado, sociedade e innovación tecnolóxica na agricultura galega, 1850-1939, Vigo, Xerais, 1992, e tamén a obra colectiva en Lourenzo Fernández Prieto (dir.), Terra e progreso. Historia agraria da Galicia contemporánea, Vigo, Xerais, 2000; Antonio Míguez Macho, La construcción de la ciudadanía a través de los movimientos sociales. El movimiento obrero en Galicia (1890-1936), Santiago de Compostela, Fundación 10 de Marzo, 2008; Miguel Cabo Villaverde, O Agrarismo, Vigo, A Nosa Terra, 1998; Xosé Miguel Andrade Cernadas e Anselmo López Carreira, O Reino medieval de Galicia. Crónica dunha desmemoria, Vigo, Xerais, 2020; Isidro Dubert e Antía Pérez-Caramés (coords.), Invasión migratoria y envejecimiento demográfico: dos mitos contemporáneos, Madrid, Catarata, 2021; véxase tamén Isidro Dubert (ed.), Historia das Historias de Galicia, Vigo, Xerais, 2016. 2 Francisco Sánchez Pérez (coord.), Los mitos del 18 de julio, Barcelona, Crítica, 2013. Introdución 21 presentación. Comezando, iso si, por disertacións que datan de moito máis antigo, e que se teñen centrado con anterioridade en cuestións como a desarticulación dos tecidos de asociación campesiños;3 e sen esquecernos doutras obras, colectivas ou non, nas que xa se estudaba tamén a cuestión do golpe e da violencia no territorio galego dende diferentes perspectivas e para diferentes lugares do territorio galego, como foi o caso de traballos como os de Emilio Grandío ou María Jesús Souto, entre outros.4 Foi o momento tamén da publicación doutras investigacións que acometían estudos relacionados con diferentes aspectos da sociedade galega en relación á ditadura, como os de Ana Cabana e as súas disertacións sobre o consenso no réxime franquista, os de Daniel Lanero con respecto ás políticas sindicais e agrarias no rural galego; nunha mesma liña de estudos agrarios no marco da ditadura, o traballo de Alba Díaz sobre os diferentes cambios nese contexto do rural galego entre o Franquismo e a transición e o de Araceli Freire sobre os montes veciñais.5 Sen embargo, foi coa publicación de dous ensaios sobre o golpe e a violencia na retagarda galega cos que se deron os primeiros pasos da posterior produción historiográfica á que nos referimos, no ano 2009,6 estudos nos que o uso da documentación relativa tanto a ese golpe e a esa violencia estaban no foco da investigación para amosar tanto os procesos nos que se envolveron ás vítimas como as formas que tiveron os perpetradores para agocharse detrás delas. E enfocando, ademais, a cuestión das prácticas violentas dentro doutros procesos similares como os xenocidios, así como establecendo a comparativa con eses outros exemplos ao respecto da forma en que as diferentes sociedades que os viviron e os superaron buscaron a reparación e a súa condena ou non tras a chegada da democracia tras os períodos ditatoriais.7 A fin da financiación, e en consecuencia do proxecto, no ano 2012, non supuxo a fin da inquedanza pola investigación na materia. Nomes e Voces suporía unha base excelente para comezar a estudar outros procesos relacionados co ocorrido dende xullo de 1936, non so coas vítimas e coaviolencia, aínda que estas estiveran no foco de forma permanente por ser un elemento central dentro do marco do ocorrido, do da investigación e das inquedanzas dos responsables dos estudos. Así, vería a luz unha primeira obras colectiva na que participaban diferentes profesores e doutorandos do departamento, e que tiña como obxectivo a análise de diversas cuestións ao redor do golpe de Estado e máis alá, e que remitía como pasaxe introdutoria ás verbas de Jorge Semprúm como marco sobre o que traballar: o de afastarse do discurso dos golpistas e dos verdugos para 3 Lourenzo Fernández Prieto, «Represión franquista y desarticulación social en Galicia. La destrucción de la organización societaria campesina, 1936-1942», en Historia Social, nº 15 (1993), pp. 49-65. 4 Emilio Grandío Seoane (ed.), Anos de odio. Golpe, represión e guerra civil na provincia da Coruña (1936-1939), A Coruña, Deputación da Coruña, 2007; María Jesús Souto Blanco, La represión franquista en la provincia de Lugo (1936-1940), Sada, Edicións do Castro, 1998; Jesús de Juana e Julio Prada (coords.), Lo que han hecho en Galicia. Violencia, represión y exilio (1936-1939), Barcelona, Crítica, 2006. 5 Ana Cabana Iglesia, Entre a resistencia e a adaptación. A sociedade rural galega no franquismo (1936-1939), Santiago de Compostela, Universidade de Santiago de Compostela, 2007; Ana Cabana Iglesia, Xente de orde. O consentimento cara o franquismo en Galicia, Santa Comba, 3C3 Editores, 2009; Daniel Lanero Táboas, Historia dun ermo asociativo. Labregos, sindicatos verticais e políticas agrarias en Galicia baixo o franquismo, Santa Comba, 3C3 Editores, 2011; Alba Díaz-Geada, Mudar en común. Cambios económicos, sociais e culturais no rural galego do franquismo e da transición (1959-1982), tese de doutoramento inédita, Santiago de Compostela, Universidade de Santiago de Compostela, 2013; Araceli Freire Cedeira, Conflictividad social en el medio rural gallego (1939-1975). El caso de los montes vecinales en mano común, tese de doutoramento inédita, Santiago de Compostela, Universidade de Santiago de Compostela, 2014. 6 Antonio Míguez Macho, O que fixemos en Galicia. Ensaio sobre o concepto de práctica xenocida, Ourense, Difusora de Letras, Artes e Ideas, 2009; Antonio Míguez Macho, Xenocidio e represión franquista en Galicia. A violencia na retagarda en Galicia na guerra civil (1936-1939), Santiago de Compostela, Lóstrego, 2009. 7 Estas cuestións referidas tamén en Antonio Míguez Macho, La genealogía genocida del Franquismo. Violencia, memoria e impunidad, Madrid, Abada, 2014. Rafael García Ferreira 22 poñer en perspectiva o golpe, a guerra e a ditadura, para coñecer a verdadeira Historia do acontecido, para que esta deixara de estar embazada polos discursos herdados dende 1936:8 Fue allí en casa de Cordón, oyéndole a Lister narrar sus hazañas militares... donde comencé a comprender que la guerra civil solo sería mitología mientras fuese cosa de ellos, de los que hicieron, y nos deshicieron, haciéndola tan mal, que solo sería historia, al fin, solo un saber práctico que nos permitiera vivir con ellas, asumiéndola críticamente, y no desviviéndonos en sus laberintos engañosos, cuando fuese cosa nuestra: de los que no la hicimos, de los que no fuimos abrumados por el peso, ideológico de tan larga leyenda de signo contradictorio...9 Este volume comezaría a poñer no centro do debate a necesidade dun relato histórico afastado do dos golpistas e do da ditadura, isto é, unha nova mirada a ese pasado co fin de superar ese relato. Un relato que recorra ás fontes, que estableza a crítica e que acabe por analizar os datos dos que dispoñemos dende unha óptima obxectiva, con rigor histórico, sen verse embazada polas terxiversacións lingüísticas e dos feitos de documentación como xuízos militares, informes de conduta, notas de prensa ou todo tipo de ordes, textos que compoñen unha inxente cantidade de pezas documentais que deben servir para recompoñer o pasado sen chegar a caer nun relato que pretendía cambiar a realidade dende o mesmo mes de xullo de 1936 para gañar un relato que, coa vitoria na guerra, acabaría por ser hexemónico e que segue a contaminar, en moitas ocasións, a nosa forma de facer Historia. Nesta dirección pretendían seguir asociados os estudos relacionados, e nese sentido avanzaron, non so agregando novos investigadores asociados -grazas á asociación mediante diferentes proxectos de investigación-, se non mediante a ampliación das perspectivas de investigación, orientando estas cara cuestión coma a das actitudes sociais en contextos ditatoriais, aplicando o estudo non so ao período da ditadura española se non aportándose outros estudos doutras latitudes, como a de América do Sur, para poder establecer comparacións, equivalencias, diferencias e debates. Neste marco, unha nova obra colectiva atraía a eses estudosos da cuestión a esta liña de investigación para tratar esta temática xa non unicamente dende o caso galego, se non dende outras perspectivas interiores e dende un enforque tamén internacional.10 Aínda chegarían dúas obras máis a este respecto, que seguirían a marcar unha liña de estudos que xa conta con varios anos de bagaxe ás súas costas. A primeira delas, Golpistas e verdugos de 1936,11 reuniunos a diversos doutorandos da área de contemporánea baixo o amparo dos nosos directores 8 Lourenzo Fernández Prieto e Aurora Artiaga Rego (eds.), Otras miradas sobre golpe, guerra y dictadura. Historia para un pasado incómodo, Madrid, Catarata, 2014. 9 Citado en Lourenzo Fernández Prieto e Aurora Artiaga Rego, «Introducción. Sabemos poco de pasado incómodo. Otras miradas sobre el golpe, la guerra y la dictadura», en Lourenzo Fernández Prieto e Aurora Artiaga Rego (eds.), Otras miradas..., p. 11. 10 Antonio Míguez Macho (ed.), Ni verdugos ni víctimas. Actitudes sociales ante la violencia, del Franquismo a la dictadura argentina, Granada, Comares, 2016. Outro volumen de interese a este respecto, con investigadores que teñen participado nos proxectos que mencionamos, é o de Miguel Ángel del Arco Blanco et al., No solo miedo. Actitudes políticas y opinión popular bajo la dictadura franquista (1936-1977), Granada, Comares, 2013. 11 Lourenzo Fernández Prieto e Antonio Míguez Macho (eds.), Golpistas e verdugos de 1936. Historia dun pasado incómodo, Vigo, Galaxia, 2018. Introdución 23 de tese para elaborar un traballo que tiña o traballo común con fontes primarias como as causas militares, base das nosas investigacións, para explicar os procesos que se puxeron en marcha dende xullo de 1936 dende diferentes perspectivas: dende os participantes, dende as lóxicas empregadas, dende a violencia, dende a construción da culpabilidade; tamén dende a memoria. Tratouse dun traballo colectivo no que as ideas que se viñan traballando durante anos por un grupo de investigadores en etapa de tese foron postas en común, enfocadas nunha mesma dirección e presentadas en forma de capítulos que comezaron a amosar os resultados da liña de investigación que se viña marcando e da capacidade dunha nova xeración de historiadores para aplicala e para traballar no marco desa liña historiográfica. O ano 2020 presenta dúas novidades a este respecto: un novo libro colectivo sobre ese novo relato, pulido en base a todo o traballo dos anos anteriores, e que reuniu a varios investigadores coas mesmas inquedanzas sobre a cuestión;12 e o 2021, ademais doutra publicación relacionada, esta vez de carácter internacional e centrada na cuestión dos espazos de violencia do golpe e da ditadura, marca o período de finalización dalgunhas das teses que se enmarcaron nestes estudos. Entre eles esta investigación, que procurará preguntarse e responder acerca dunha serie de cuestión ao redor do golpe de Estado de 1936. Consideracións previas, preguntas e obxectivos Esta investigación ten un marco específico e definido: territorialmente,a cidade de Santiago de Compostela; cronoloxicamente, o golpe de Estado de 1936, abarcando os meses posteriores para algunhas dinámicas que se estudarán -e aos meses anteriores, para outras-, e estendendo o marco ata a década dos corenta para outras, como no caso do estudo dos espazos de violencia. A inquedanza polo período e o espazo, e a dispoñibilidade de fontes que poden ser examinadas cunha nova mirada, son factores que levaron a decidirse por realizar esta investigación. Tamén hai un criterio de afinidade, por ser a cidade na que o autor se criou. Por iso é unha tese que se referirá a un modelo, ao modelo da cidade de Santiago, ao que ocorreu antes, durante e tras o golpe de Estado nela, a que dinámicas actuaron e aos procesos que se levaron a cabo. Enfocaremos, polo tanto, unha perspectiva de caso. Considérase aquí que o punto de vista do local é de ampla importancia para a consecución de estudos xerais, que contribúan a entender os acontecementos que se sucederon nun determinado período de xeito máis redondo, permitindo unha interpretación máis analítica. Isto se debe a que entendemos que neste nivel da investigación é onde se poden atopar toda unha serie de matices que van máis alá de visións xerais, e que amosan realidades que é máis sinxelo que se perdan ao falar de obras que abarcan os acontecementos dun xeito máis amplo. Por iso, tamén consideramos que o estudo dun caso como este, que axude a comparalo con outros similares -ou con outros diferentes-, pode chegar a ser máis representativo, e de moita utilidade, á hora de aclarar e explicar mellor o mapa do ocorrido nun acontecemento tan relevante para o século XX español como o golpe de Estado de 1936. 12 Lourenzo Fernández Prieto, Antonio Míguez Macho e Dolores Vilavedra Fernández (eds.), 1936. Un nuevo relato, Zaragoza, Prensas de la Universidad de Zaragonza, 2020. Rafael García Ferreira 24 Grazas ao traballo previo coa bibliografía, pero sobre todo ao traballo coas fontes primarias que seleccionamos, atenderase a unha cuestión que consideramos fundamental, e que xa viñamos adiantando ao falar das liñas de investigación e publicacións nas que se enmarca este texto: a historicidade dos feitos. Tentaremos constatar o que ocorreu detalladamente nos contextos que analizamos, afastándonos así de textos, discursos e relatos establecidos ata o momento, pois como veremos estes apareceron dende moi cedo para terxiversar en boa medida non so a memoria do ocorrido, senón tamén investigacións contemporáneas. O contraste entre o que xa sabemos sobre o pasado e as fontes, o coñecemento de lexislacións, procesos e acontecementos, será o que nos permita unha lectura crítica histórica da documentación que manexaremos para finalmente abordar unha explicación que precise, tamén dende o punto de vista da linguaxe empregada, como e por que ocorreron certos procesos no marco do golpe e da violencia que se desencadeou posteriormente. A violencia, precisamente, será un dos puntos básicos que trataremos. O golpe pretendía a toma do poder, pero para conseguir o seu obxectivo non acudiu ás dinámicas dos pronunciamentos do século XIX, nin contou coa conivencia do monarca como o fixera en 1923, senón que o fixo mediante unha violencia dirixida contras as institucións e contra os rexedores republicanos. Estes sufrírona con especial intensidade durante a segunda metade de 1936 naqueles lugares onde triunfou a sublevación, enfrontándoa logo nunha guerra civil que acabaría por alongarse ata abril de 1939. A persecución e a violencia do golpe de Estado, contemplada xa nas instrucións do director da conspiración, Emilio Mola, atenden á vontade de desprazar a esas autoridades, pero tamén á da desarticulación dunha sociedade de longa tradición liberal e xa democrática, descabezándoa para eliminar a vontade de protesta e disidencia, de tomar posición contra o golpe, de desafección e de defensa da democracia. Por isto, atendendo a esa historicidade que mencionabamos, o primeiro que debemos establecer é que foi o golpe, e non a guerra, o que abriu ese escenario de violencia, un punto de moita importancia nesta tese. Isto, por suposto, tampouco quere dicir que a violencia so existira a partir do golpe: os repertorios de acción violenta existían con anterioridade, e de feito foron unha constante para á Europa de entre guerras, en diferentes países e baixo diferentes formas; como métodos de protesta e como métodos represivos; en democracias, en contextos de pugna de poder e nos réximes ditatoriais que triunfaron ao longo do continente durante este período. Nos territorios onde triunfa, o golpe inaugura un escenario no que impera a lóxica de eliminación do inimigo como método para acadar o poder e, paralelamente, unha lóxica de auto-lexitimación por parte dos golpistas, expresada a través de diferentes discursos inseridos nos procesos sumarísimos. Pero foi o golpe, e non a guerra, o que deu paso a esta situación. De aí as inxentes cantidades de mortos en retagarda durante a segunda metade de 1936, os xuízos na retagarda, as «sacas» e os «paseos», as depuracións e destitucións de empregados públicos. Todo iso en lugares onde o golpe triunfou, como no caso de Galicia, e onde nunca houbo fronte de guerra como tal, pero si unha fonda persecución asociada ao golpe e ao control do poder. A violencia nas súas diferentes formas será unha constante a analizar ao longo desta disertación. Comezando polos pasos previos ao golpe de Estado, onde comezamos a preguntarnos como se sucederon os acontecementos. A este respecto, ten sido referenciada e estudada, como o Introdución 25 paso previo e xa asimilado como natural, a conspiración para a sublevación. En moitas ocasións e en referencia ao papel de Emilio Mola como «Director» da mesma, dándolle unhas dimensións que tentaremos comprobar se se correspondían con toda a realidade do país nos meses anteriores a xullo de 1936. Chegou realmente esa conspiración a todas as prazas militares, a todas as guarnicións, independentemente da súa relevancia, como a de Santiago de Compostela? Coñecer se existiu unha preparación real para o golpe e unha colaboración entre militares e outros axentes auxiliares ten o obxectivo de constatar o factual da situación, cuestionándonos se os discursos posteriores que se escribiron sobre esa conspiración se corresponden co que ocorreu ou se se construíu un discurso interesado que mitificaba determinadas figuras para colocalas nunha posición de compromiso que teremos que comprobar se en realidade amosaban ou non. Corroborar se existiu unha preparación ou non tamén nos axudará a ver se esta tivo operatividade real á hora de executarse o golpe de Estado ou se isto respondeu a outros factores, e se a súa existencia nos axuda a comprender as circunstancias nas que se conforma o poder golpista con posterioridade, tendo en conta que foi o golpe o que exerceu como determinante de quen estaría ou non no poder ou en certos postos de responsabilidade. Cuestionaremos as dimensións de todo isto para constatar a forma en que se secuenciou o proceso de toma do poder pola forza, contrastándoa aos relatos posteriores dos golpistas. O golpe de Estado é o primeiro acto de forza que se leva a cabo para o control das institucións e do poder. Supón o desprazamento das autoridades lexítimas, amparadas pola legalidade republicana, mediante a ameaza, a coacción ou a perspectiva de que se executen accións violentas se hai oposición. Isto quere dicir que hai moito máis que unha simple toma militar dos edificios institucionais: durante o golpe hai dúbidas, medos, decisións ou inhibicións, e con toda probabilidade máis incertezas que seguridades, tanto por parte dos que tentarán manter a orde constitucional como por parte dos que decidirán rompela e tomar posición como golpistas. Constatar que dinámicas ocorreron tanto por parte duns como por parte doutrosaxudaranos a comprender mellor o proceso do golpe na cidade. Neste caso, de novo, haberá que ser coidadosos: as fontes empregadas para este cometido adoitan levar a firma dos que precisamente exerceron a violencia -como o relato dos feitos nos informes finais das causas militares-, empregándose unha linguaxe que, como xa advertiamos, terxiversa de forma interesada a presentación dos feitos. A análise pertinente desas fontes e a constatación de realidades, evitando caer nesas tramas discursivas, é a que nos permitirá un coñecemento previo do ocorrido. É o golpe, como diciamos, o que inaugura toda unha serie de dinámicas que se darán desde o momento en que triunfa. Afondaremos nos diferentes procesos que as autoridades golpistas poñen en marcha dende finais de xullo para facerse co poder e en como a violencia formou parte deles, dunha ou outra forma, para que acadaran o seu obxectivo. A análise das causas militares abertas polos golpistas axudaranos a comprender a forma en que se culpabilizou a unha parte da sociedade de actos que en realidade non cometeran ou que se axustaban á legalidade vixente, á legalidade republicana, e que estaban amparadas polas leis republicanas. Cuestionarémonos os discursos que nos atopamos en procesos sumarísimos como foron as causas militares, para constatar esa construción do relato que xa se deu dende o primeiro momento. Preguntarémonos para que serviu esa violencia e contra quen se exerceu, e por que contra certas persoas, pero tamén como funcionaron as mecánicas desa violencia, quen as executou e que consecuencias tiveron. Que Rafael García Ferreira 26 supoñía a lóxica de eliminación iniciada no verán de 1936? Respondía a unha operación de «limpeza» social ou tamén levaba asociada a lexitimación do ocorrido para a tomar do poder? As causas axudarannos ademais a coñecer a certos protagonistas e a cuestionarnos cal foi o seu papel real. Non so os incoados contra as vítimas que defenderon a legalidade, senón tamén os que acabaron enfrontando a partidarios do golpe ou a golpistas como tal. Indagar nestes, como veremos, permitiranos ver a complexidade de todo o ocorrido e constatar diferentes posturas incluso dentro dun mesmo proceso como a sublevación. Os diferentes discursos que veremos outorgarannos as ferramentas para traballar sobre un mapa de ordes, decisións e confrontacións incluso entre os que apoiaron unha solución de forza, e a preguntarnos se todos os que optaron por esta estiveron logo dispostos a exercer a violencia necesaria para acabar definitivamente coas autoridades e tomar o seu posto, ou se pola contra consideraban chegar ata certo punto sen ir máis alá. Ao respecto deses novos poderes, analizaremos como se configuraron, quen os compoñía e como funcionaron. E, sobre todo, veremos quen tiña realmente poder ou quen simplemente era designado como delegado e colaborador de autoridades superiores, cuestionando como se executaban as cadeas de decisión e sobre quen recaía realmente a responsabilidade. Non so se analizará a composición do poder ou o pasado dos que o pasarán a rexentar, se non tamén o grao de apoio, o seu grao de implicación, para con certo procesos. Preguntarnos pola violencia fará que vaiamos máis alá. O desprazamento, persecución e asasinato das principais autoridades políticas -e militares- republicanas suporá a substitución e a asunción das súas funcións por outras persoas, nomeadas seguindo a xerarquía que pasa a imperar, e que terán que acometer certas tarefas como o que pasa a entenderse como orde pública ou a depuración e despido de empregados públicos. Analizar en que medida se colaborou por parte dos nomeados, en que medida se exerceu presión sobre esas novas autoridades para que actuaran e en que medida se negaron ou se desentenderon desas tarefas tamén será fundamental para entender tanto a violencia como os cambios nos gobernos locais e os efectos colaterais de ambos feitos. Para tentar comprender como se conformaron eses poderes, en que condicións, como se exerceu a violencia e quen a exerceu. Unha última cuestión que trataremos será a dos espazos de violencia, analizando aqueles que operaron para os golpistas en Santiago de Compostela. Faremos unha caracterización de cada un deles para despois pasar a situalos e ver como actuaron dentro do marco do golpe e, neste caso, máis alá, pois no caso dos espazos de reclusións seguiron a empregarse dinámicas que nos interesará constatar ata unha década despois de iniciado o golpe de Estado. Isto tamén nos aportará unha visión máis longa de como evolucionaron certas formas de actuación e axudará a polas en perspectiva cunha mirada cronolóxica máis ampla, axudándonos a entender mellor as dinámicas de violencia no golpe asociadas aos espazos. Preguntarnos polos espazos empregados e que supuxo a súa utilización parécenos unha forma de engadir unha categoría analítica á cuestión do golpe que en moitas ocasións é tratada de forma independente ou tanxencial, pero que no noso caso se presenta como unha área de estudo ligada pola importancia na ocupación, tanto física como simbólica, de toda unha serie de lugares que forman parte do cotián na cidade que analizamos. Introdución 27 O obxectivo desta investigación é estudar o que ocorreu na cidade de Santiago de Compostela antes, durante e con posterioridade ao golpe de Estado, incidindo en como o uso da violencia foi o mecanismo que permitiu arrebatar o poder lexítimo ás autoridades republicanas para que o pasaran a controlar as golpistas. E facelo como estudo de caso para descubrir no micro o que agocha o relato dos vencedores e identificar a confusión do relato das vítimas. Recorremos a estudo de caso para establecer un modelo que cuestione as interpretacións xerais sobre o golpe, e que non sempre son equiparables ao que ocorreu no plano micro, pois cando acudimos a este atopámonos con realidades moito máis complexas e profundas nas que afloran todos os procesos e variables que se deron. Este modelo poderá ser, con posterioridade, aplicable ou non a outros casos, ao igual que outros poden ter concordancias ou diferenzas co que aquí se conclúa. Ao fin e ao cabo, son este tipo de investigacións as que revelan as especificidades de cada lugar e que axudan a completar un mapa complexo das situacións que abriu un acto como un golpe de Estado. Rafael García Ferreira 28 Fontes documentais e metodoloxía 29 Fontes documentais e metodoloxía As fontes documentais, primarias, son unha parte fundamental de todo traballo histórico de investigación que busque afondar nunha cuestión por primeira vez ou dende un enfoque diferente a aquel co que foi estudada con anterioridade. Esta disertación non é un caso diferente, pois os feitos e argumentos que aquí se presentan están apoiados en fontes coas que se ven traballando dende que se iniciou a investigación. Foi empregada documentación diversa, recompilada de diferentes arquivos -non so locais ou provinciais, se non tamén estatais-, o que implicou un traballo de recolla de información, de viaxe aos pertinentes arquivos, de consulta de fondos documentais, de consulta da documentación e, finalmente, de análise e uso da mesma mediante, facéndoselle as preguntas pertinentes para acadar os resultados que agora se presentan. O traballo de arquivo e con documentación non está suxeito so ao desprazamento físico a estes, se non tamén á consulta online ou ao manexo de determinadas bases de datos. Nos nosos días temos a vantaxe de contar con formas de obter información de forma inmediata, ben coa comunicación directa cos arquiveiros, porque contamos con repositorios online, ou ben porque, neste caso concreto, contamos cunha base de datos como Nomes e Voces, elaborada con anterioridade, e que serviu como base para todo o traballo posterior. A base do proxecto foi elaborada durante o período no que esteestivo activo, recollendo información das vítimas do período da guerra civil -e en ocasións, algo máis alá- de diferentes fontes documentais, bibliográficas e orais. Isto permitiunos coñecer non so a esas vítimas, se non ademais, na maioría de ocasións, os procesos polos que pasaron e nos que as autoridades golpistas as involucraron, sendo o caso máis representativo as causas militares. O coñecemento da fonte pola que foron coñecidas esas vítimas axudou a acudir a esta e, a partir de aí, analizar os diferentes procesos que agora se expoñen nesta investigación: como se levaron a cabo, quen os levou a cabo, para que serviron, que obxectivo tiveron. É dicir: o coñecemento das vítimas levounos a un coñecemento máis amplo sobre todo o que as rodeou. O valor do proxecto, que en principio era o da documentación de todos os que sufriran a persecución ou a violencia dende xullo de 1936 e durante o período da guerra civil, acabou por converterse na base de todo o demais. A través do filtrado de vítimas de veciños de Santiago de Compostela, para o noso caso, puidemos ter un coñecemento doutras fontes que podían ser de utilidade, concretar os procesos e acudir a eles, ou mesmo elaborar cousas tan visuais e útiles como liñas de tempo, cronoloxías, gráficas, táboas, etc., que permitan visualizar de forma directa como se deron certos acontecementos en determinados momentos. A isto hai que sumar o fondo de entrevistas co que conta Nomes e Voces. Foron consultadas algunhas relativas ao acontecido na cidade, realizadas a familiares de vítimas -vítimas tamén, ao fin Rafael García Ferreira 30 e ao cabo- ou a persoas ás que dalgunha forma afectaron os acontecementos. Polo tanto, cabe destacar non so a base de datos de vítimas, se non tamén o inxente fondo de entrevistas. A este, ademais, hai que sumar o fondo de Historia Oral de Galicia (HISTORGA), creado xa en 1987, e que xa contaba cunha grande cantidade de entrevistas nas que se falaba do período da guerra civil. Ámbolos fondos, xunto ao corpo de entrevistas HISTORGA Migracións- forman hoxe en día unha unidade documental recollida no fondo Terra e Memoria, que abrangue máis de dúas mil entrevistas en total. Agora ben, tamén se tivo en conta que a base de datos de vítimas non é infalible nin completa. Alén do gran mérito que tivo a súa elaboración, esta fíxose á vez que se adquiría o coñecemento. Debido a isto, nalgunhas ocasións as categorías das vítimas poden resultar confusas ou incompletas con respecto ao suceso que sufriron; do mesmo xeito, os ítems descritivos non sempre se amosan unificados, algunhas veces polo cambio de criterio á hora de elaboralos e noutras porque simplemente non se conta con toda a información necesaria para ofrecer os mesmos datos para todas as fichas. Hai que destacar, aínda así, que en cuestións como as vítimas de «paseos», a información que se recolleu foi en moitas ocasións moi completa, froito do traballo cos rexistros de defuncións, concretándose incluso os lugares exactos de aparición de cadáveres en camiños e estradas. Sen embargo, atópanse tamén baleiros de contido, froito de que o acceso á documentación podía non estar dispoñible no momento en que se elaborou a base e polo tanto non se tivo acceso a diferentes datos sobre vítimas ou sobre os procesos que sufriron. Así, se por exemplo atopamos ao persoal do maxisterio e da Universidade afectado polas depuracións, non ocorre o mesmo co persoal do concello de Santiago que foi depurado e suspendido de emprego e soldo durante a segunda metade de 1936, que non aparece reflexado en Nomes e Voces. Este caso concreto foi emendado neste traballo grazas ao acceso a un fondo de documentos do Arquivo Histórico Universitario de Santiago, catalogado tras recibir un último envío dende o Arquivo Municipal do Concello, e que agora si está dispoñible para a consulta pública. Outro dos problemas que presenta Nomes e Voces é a súa estrutura interna para o manexo das buscas e dos datos. De novo, debido a que se trata dunha base elaborada hai xa máis dunha década, respondendo ás necesidades do momento e executando ideas, en moitas ocasións, segundo se lle ían presentando diferentes cuestións aos investigadores implicados. Internamente, a base conta cun sistema de busca complexo que permite chegar a todo tipo de resultados, pero certos problemas cos servidores e cunha certa obsolescencia nos sistemas de recompilación e busca de datos fai que os resultados que arroxan as buscas sexan en ocasións erróneos ou incompletos. Se ben esta problemática se ten presentado ao longo dos procesos de manexo da base, foi superada grazas ao traballo conxunto dos investigadores de Histagra, que colaboramos en diversas ocasións para chegar a acadar cifras correctas, adecuadas e que se axustaran á realidade con respecto aos datos que se conteñen en Nomes e Voces. A partir do coñecemento das vítimas que pasaron por un proceso como un xuízo sumarísimo, podemos coñecer a documentación relacionada: as causas militares. Todos aqueles que pasaron por un proceso deste tipo teñen un rexistro na base co número de causa no que foron acusados, Fontes documentais e metodoloxía 31 procesados ou inculpados. Polo tanto, coñecido o número e os suxeitos e procesos que queriamos investigar, so quedaba dirixirse ao arquivo pertinente, o Arquivo Intermedio Militar Noroeste (AIMNOR) de Ferrol. Aínda que as causas foron consultadas no seu momento co obxectivo de elaborar unha relación de vítimas, moitas delas aínda non foron estudadas da forma que se fai aquí -ao igual que outras si teñen sido empregadas por outros investigadores-. No AIMNOR consérvanse procedementos sumarísimos relativos, para o caso que nos ocupa, ao territorio que abarcaba a VIII División Orgánica, con xefatura na Coruña, entre os que están os incoados en Santiago de Compostela. O arquivo é público e os fondos están dispoñibles para a consulta para calquera cidadán que acredite a súa identidade, que facilite os datos pertinentes ao arquivo e que solicite unha cita para a consulta da documentación na que este interesado. Consideramos importante remarcar este punto, pois aínda son frecuentes as polémicas sobre o hermetismo de fontes deste tipo, gardadas en arquivos militares, considerándose en moitos casos que son inaccesibles e que son necesarios unha serie de trámites esgotadores para a poboación que quere consultalos. Ao contrario, son arquivos abertos e totalmente accesibles, e non é necesario unha condición profesional específica para que a documentación lle sexa proporcionada a ninguén. Así era cando se consultaron intensivamente durante a elaboración da base de Nomes e Voces e así segue sendo hoxe en día, para investigadores ou para calquera cidadán que busque facer unha consulta. Foron consultadas unha mostra de causas nas que se encartaron a veciños da cidade de Santiago, e entre estas especialmente aquelas nas que as vítimas foron condenadas a pena de morte por parte dun consello de guerra. O traballo con esta documentación resultou básico dende o principio e vense realizando dende hai anos como base fundamental para comprender toda unha serie de procesos e dinámicas, coñecer aos protagonistas -vítimas e verdugos- e constatar toda unha serie de discursos creados por primeira vez nelas, o uso tendencioso da linguaxe e a forma de presentar os feitos e acontecementos por parte dos golpistas que serán analizados durante a investigación. Este traballo coas causas militares é común a toda unha xeración de investigadores do grupo Histagra, reunidos en torno a unhas tendencias de estudo do período, que axudou en moitos aspectos a que a investigación, as disertacións e as conclusións que se presentarán avanzaran grazas ao debate conxunto e a posta en común de inquedanzas, contradicións, e conclusións. Para moitos destes trátase dunha fonte básica que está a amosar -e que xa amosou-resultados satisfactorias na investigación, constatándose así o acertado da súa elección como base para tratar diferentes cuestións ao redor do golpe de Estado do 36. O arquivo máis próximo que se empregou, sen embargo, foi o Arquivo Histórico Universitario de Santiago. A pesar da súa denominación, ven albergando os fondos históricos municipais, incluíndo todo tipo de documentación, e contando actualmente cun volume que abarca varios séculos de historia da cidade. Como xa adiantabamos, os últimos envíos dende o Arquivo Municipal do concello fai que todos os fondos dispoñibles para a consulta e investigación se atopen arquivados aquí, sendo unha referencia de moita utilidade para abordar diferentes estudos. Farase uso de documentación tan fundamental como as actas dos plenos do concello, pero tamén de informes de orde pública -anteriores e posteriores ao golpe-, expedientes locais referidos ao persoal municipal e referido a edificios, espazos, que tamén teñen moito interese para o que aquí se trata. Rafael García Ferreira 32 Ademais, aínda que non son frecuentes de atopar nos fondos municipais, exporemos unha serie de fotos relacionados con expedientes de prisións, que nos axudarán a completar a explicación que faremos sobre estes lugares en concreto. Debido tanto á súa proximidade como á grande cantidade e variedade de fondos cos que conta, este arquivo foi un dos máis recorrentes á hora de facer consultas, a pesar de que, quizais, non sexa o que maior carga documental acabou por aportar ao estudo. Complementariamente empregouse o Arquivo do Reino de Galicia, este sito na cidade da Coruña, como apoio ao Arquivo Histórico Universitario. Non so pola súa proximidade xeográfica e facilidade de acceso, se non porque contén documentación que é, en efecto, complementaria á dos fondos municipais do arquivo local. Sobre todo foi empregada a documentación relativo ao fondo do Goberno civil, que contén expedientes, comunicacións, información relativa ás comunicacións entre os órganos de goberno local e o provincial. De aí que certas cuestións que non se poden completar empregando a documentación dispoñible en Santiago de Compostela si o poidan ser suplindo esa falta cos fondos do Arquivo do Reino de Galicia. Tamén apareceron novas cuestións ao examinar a información que contén, pois non sempre se accedeu a el co ánimo de afondar nalgún aspecto que xa se comezara a coñecer, se non que en ocasións teñen aparecido novas preguntas gracias a examinar estes fondos. Aínda que neste o arquivo si conta cun fondo fotográfico extenso e de interese, non atopamos ningunha fotografía que nos fora de relevancia para este estudo, se ben non se pode deixar de destacar o traballo de catalogación que se ten levado a cabo nese aspecto por parte do arquivo. A partir de aquí, as nosas fontes documentais dan un salto que vai alén do local e provincial, e incluso máis alá do ámbito galego. Porque a pesar de que o noso suxeito de estudo sexa a cidade de Santiago, foron empregados fondos de arquivos estatais que contiñan información fundamental para avanzar en certas cuestións, que non era posible atopar nos arquivos máis próximos. Realizáronse contactos con diferentes arquivos, visitas aos mesmos -no caso de algúns, varias, con diferentes perspectivas, visións do que se buscaba e diversidade nos resultados-, pero tamén con outros cos que finalmente non se contou. Este uso de arquivos que van máis alá do contexto galego enriqueceron a investigación con outros matices, con outras experiencias e con outros puntos de vista, por iso non podemos deixar de poñelos en valor. Sobre todo porque para certos aspectos foron fundamentais, aportando a este traballo documentación que nunca foi empregada con anterioridade, dotándoo así dunha orixinalidade e dun enfoque que sería impensable doutro xeito. O primeiro que mencionamos, por ser o tamén primeiro que se puxo no punto de mira e o primeiro en visitarse, é o Archivo General de la Administración de Alcalá de Henares. Este conta cunha grande cantidade de fondos distribuídos en diferentes categorías, de entre as que nos rescatamos a de xustiza e, dentro da mesma, unha serie de expedientes referentes ao corpo de prisións, posteriores ao golpe de Estado, e que nos axudarán a reconstruír unha serie de cuestións referentes aos espazos de reclusións de Santiago que serían irrecuperables de non contar con esta documentación. Isto é debido a que non conservamos un libro de cárcere de ningunha das que operaron na cidade, e polo tanto en ocasións é moi complicado reconstruír certos aspectos. Contar cos fondos do Archivo General de la Administración, sen embargo, axudounos a recompoñer unha serie de cuestións, como o funcionamento interno das prisións, dar algunhas trazas da vida dos Fontes documentais e metodoloxía 33 presos e incluso chegar a ofrecer organigramas do persoal. Porén, a pesar de que aquí nos sexa de utilidade o fondo de Xustiza, non podemos deixar de remarcar de novo a grande cantidade de fondos que manexa o arquivo e que de seguro foron, son e serán, recorridos por outros investigadores para tratar cuestións moi diferentes. Continuando coa mesma temática, foron obxecto de estudo os fondos Secretaría General de Instituciones Penitenciarias de Madrid, neste caso nunha única visita que foi suficiente para explorar o que nos podía ofrecer, algo que tivo que ver tamén coa posibilidade de recibir prontamente unha copia dixital de todo aquilo que interesase para unha consulta posterior. Neste caso, empregamos dúas publicacións que so atopamos dispoñibles neste arquivo: o semanario Redención, a única publicación de distribución e lectura interna dentro das prisións do período no que nos movemos, e a Revista de estudios penitenciarios, outra publicación relacionada co mundo das prisións. Ambas nos axudaron a recoller datos sobre este tipo de espazos que complementarían o atopado no Archivo General de la Administración e no Arquivo Histórico Universitario, aportando datos de relevancia non so, de novo, para analizar a vida dos presos se non tamén os organigramas de funcionamento do persoal prisións. Acudeuse tamén, xa con outros obxectivos, a Biblioteca Nacional de España, aproveitando as visitas a Madrid nas que se acudiu ao Arquivo General de la Administración e á Secretaría General de Instituciones Penitenciarias. Esta comezou como unha visita complementaria para investigar que se podía atopar de utilidade nos seus fondos, xa que a pesar de poderse facer unha busca completa online, non toda a documentación está dixitalizada, sendo necesaria a consulta presencial. Deste xeito, so foron consultadas algunhas cuestións referentes á cidade que nos podían ser de utilidade, e en todo caso complementaria co que xa atoparamos no Arquivo Histórico Universitario. O que si foi de moito interese e utilidade foi o seu fondo fotográfico, este en boa medida si dispoñible online, que nos aportou unha serie de imaxes da cidade que non atopamos mediante outras canles, nomeadamente aquelas que recollen a visita a cidade de autoridades de peso como Ramón Serrano Suñer -acompañado dos representantes italiano, alemán e xaponés- ou o propio Francisco Franco e de desfiles militares que amosan os cambios nas conmemoracións e celebracións na cidade, ou o que é o mesmo, imaxes que nos axudarán en boa medida a exemplificar os cambios na apropiación e uso do espazo público asociados ao golpe de Estado. Para a investigación que se presenta foron empregados expedientes persoais de membros do exército e da Garda civil relacionados con sucesos que se estudan, que tiveron protagonismo nalgún dos procesos ou que ocuparon un cargo de relevancia en determinado momento. O obxectivo disto foi coñecer e trazar as súas traxectorias para tentar relacionalas co que fixeron ou non fixeron, con ese posto que ocuparon ou coa súa participación ou inhibiciónen determinados asuntos. Non sempre se fan explícitas estas traxectorias, pero foron de utilidade para un mellor coñecemento dos actores que enriquecerá a presentación das interpretacións e dos resultados. A este respecto, e para conseguilos, contactouse fundamentalmente con dous arquivos. O primeiro deles foi o Archivo General del Ministerio del Interior, sección da Garda civil, de onde se extraeron expedientes deste corpo co fin mencionado, xa que algúns dos seus efectivos non so se sublevaron en xullo de 1936 se non que posteriormente tiveron a responsabilidade na Delegación de orde pública, creada tras a sublevación. O segundo foi o Archivo General Militar de Segovia, ao que se solicitaron os Rafael García Ferreira 34 expedientes pertinentes pertencentes a membros do exército, aínda que hai que aclarar que non todos os que desexaríamos, pois algúns aínda non estaban dispoñibles debido a diversas disposicións legais. No caso do arquivo relacionado coa Garda civil non se chegou a realizar visita física, se non que se recibiron as copias dos expedientes directamente; no caso do arquivo segoviano, non foi posible acceder ao mesmo a pesar de ter unha visita programa, algo que finalmente compensamos con sucesivas peticións de documentación. Ao igual que no caso do Arquivo Intermedio Militar Noroeste, non foi necesario acreditar a condición de investigador, membro de grupo de investigacións, adscrición a unha universidade ou proxecto, etc., para acceder á documentación, se non que se trata de fontes que igualmente están dispoñibles para o conxunto da cidadanía. Tamén examinou e consultou unha unidade arquivística militar máis, o Archivo Militar General Militar de Ávila, este si de forma presencial durante unha estadía na cidade para acceder a todo o material que puidera ofrecer, aínda que tamén está dispoñible un servizo de reprodución e envío de documentación. A pesar de que era un arquivo do que se tiñan menos referencias sobre o que podía conter, o feito de que apenas fora empregado e referenciado con respecto a unha investigación deste estilo para a cidade de Santiago suscitou a necesidade de exploralo, unha decisión que a todas luces resultou acertada. Aquí poden ser consultados documentos de moito interese para o estudo do golpe de Estado e que xa teñen sido indagados por diversos investigadores, como documentación relativa aos contactos entre sectores monárquicos coa cúpula do goberno italiano para concretar axudas monetarias e de armamento para preparar unha sublevación, ou as xa famosas e máis que referenciadas instrucións de Mola nas que establece as pautas de actuación para o golpe de estado de xullo do 36. Para o noso caso será de moita utilidade e empregado con frecuencia un expediente diferente ás causas militares, unha información aberta contra o comandante militar da guarnición de Santiago en xullo de 1936, que se convertería en golpista, pero que con posterioridade pasaría por este proceso no que se buscaba depurar a súa actitude con respecto á sublevación. O interese neste documento específico, que non foi empregado antes na investigación sobre o golpe de Estado en Santiago e Galicia, irá máis alá do propio proceso contra a autoridade militar, xa que nel aparecerán reflexados outros persoeiros, outras situacións e outras dinámicas que nos permitiran constatar que variables se deron noutros procesos da segunda metade de 1936 ademais do mesmo golpe e da violencia posterior. Foron consultados dous arquivos máis, neste caso co obxectivo de ter acceso a un fondo documental específico: o que contén a denominada Causa General. Con este obxectivo foi consultado o Archivo Histórico Nacional, pois as referencias coas que se contaban acerca da Causa facían constar que a consulta da mesma fora realizada neste arquivo. Sen embargo, esta documentación foi trasladada hai uns anos a outro conxunto arquivístico: o Centro Documental de la Memoria Histórica de Salamanca. A este realizouse unha viaxe, coa que se aproveitou a consulta doutros documentos que puideran resultar útiles, e posteriormente foron solicitadas as pertinentes reproducións para ser empregadas con posterioridade. A pesar deste traballo de documentación, a Causa General non é empregada como fonte nesta investigación. A Causa ten sido empregada como fonte para o estudo da conspiración militar contra a República e para aclarar certos aspectos sobre o propio golpe. Estruturada nas denominadas Fontes documentais e metodoloxía 35 «pezas», empregábase concretamente a segunda, na que se trataban estes asuntos con referencias documentais e testemuñais. Constatado isto, a Causa amosábase como unha fonte potencialmente moi rica para un estudo como que agora expoñemos, pero presenta unha problemática: non foi elaborada de xeito homoxéneo e en base a uns criterios únicos, se non de forma independente para cada unha das Divisións Orgánicas que dividían o país militarmente no momento da súa elaboración. Isto fixo que a súa construción fora desigual segundo o territorio do que falemos, e no caso da VIII División a información que contempla é moito menor comparada con outros casos. En concreto, non existe unha peza segunda que conteña información relativa a Galicia e demais territorios da división, polo que finalmente non foi empregada neste sentido, o que probablemente máis nos interesaba polo afán de constatar como de profunda e efectiva foi a preparación do golpe de Estado en terras galegas. Finalmente, non podemos deixar de facer mención a outra parte fundamental das fontes empregadas nesta investigación: os repositorios de publicacións oficiais e as hemerotecas dixitais de prensa. Os primeiros son ofrecidos polos portais oficiais do Estado español, e neles puideron ser atopados os números da Gaceta de Madrid e do Boletín Oficial del Estado que necesitamos consultar para coñecer lexislacións, decretos, disposicións e etc., realizadas tanto polos gobernos - dende o período da Restauración ata a mesma República- como pola cúpula golpista -representada primeiro na Junta de Defensa Nacional dende o 28 de xullo de 1936 e na Junta Técnica del Estado dende o 1 de outubro do mesmo ano-. En canto ao Boletín Oficial da Provincia da Coruña, foi consultado no repositoro online Galiciana, Biblioteca Dixital de Galicia, que contén unha inxente cantidade de fondos ademais desta publicación. Entre eles, unha grande cantidade de diarios dixitalizados, de entre os que destacaremos dous: El Compostelano e El Eco de Santiago, por ser os dous diarios locais do momento e os máis referenciados ao longo do texto, precisamente por esta condición que fai que nos poidamos atopar coas novas máis próximas á cidade. Sempre tendo en conta que eran dous diarios cunha marcada tendencia ideolóxica asociada a posicións de dereita, amosando en consecuencia unha liña editorial e de opinión, incluso á hora de expoñer novas, coa que é necesario ser críticos á hora de analizalo e de empregalo como fonte complementaria. Aínda serían empregados dous fondos máis para facer algunhas consultas deste tipo: a primeira, o da hemeroteca da Biblioteca Xeral da Universidade de Santiago, onde se atopan algunhas publicacións que non están dixitalizadas online, e o segundo, o da Hemeroteca de Madrid, ao que tamén se fixo unha breve visita para consultar unhas publicacións non dispoñibles nos outros medios dos que dispoñiamos. O uso de novas de xornais foi un complemento para o resto de fontes empregadas, pois en ocasións nos permite coñecer datas, eventos, etc., que se perden noutro tipo de documentación. No seu caso, tamén se usou para a cuestión do trazado de traxectorias persoais, pois o achado de novas relacionadas coas persoas que se queren trazar aporta datos que non vemos reflexados noutras fontes. A metodoloxía para o uso das diferentes fontes aquí empregadas non difire do que adoita ser un traballo deinvestigación histórica: coñecemento anterior, lectura, análise, crítica, cruce de datos, interpretación e chegada a conclusións. Claro que, dentro de todos estes procesos, hai diferencias na forma en que se tratan algúns documentos ou outros, fundamentalmente debido á súa tipoloxía. Rafael García Ferreira 36 Nestas páxinas trataremos documentación oficial, administrativa, lexislacións, e sobre todo causas, expedientes, informes, etc., de carácter militar que foron xeradas baixo unhas condicións de convivencia específicas e de excepción como as que se xeran tras un golpe de Estado militar, no que o control da orde pública se volve algo fundamental e se exerce a través da violencia. As causas militares son parte central do traballo que aquí se presenta. Foron empregadas para diversas cuestións, pois nelas non so constatamos os procesos e como se levaron a cabo, se non que tamén conteñen información que é útil para tratar moitas outras cousas: o golpe e a actuación dos leais á República, os discursos que se xeneral nelas, a construción da culpabilidade, as formas de auto-lexitimación dos verdugos que actúan ao longo dos xuízos. Por iso a súa correcta interpretación é esencial para que os datos que extraemos delas sexan correctos e non acabemos por reproducir un discurso terxiversado dende a base: o discurso dos golpistas e verdugos. Viñamos destacando que a cuestión da linguaxe é fundamental á hora de abordar as causas, porque é mediante a linguaxe a través da cal se terxiversan feitos que acaban de ocorrer baixo un marco legal específico para presentalos como ilegais, ilexítimos, punibles. A reprodución dos discursos xerados nas causas perdurará no tempo grazas á vitoria na guerra dos sublevados e á imposición dunha ditadura militar de case catro décadas. Por iso, acostumados a escoitar certos argumentos, resulta fundamental evadirse dos mesmos, non caer na trampa e acadar conclusións axustadas ao que realmente ocorreu, achegando unha aproximación rigorosa dende a crítica de fontes, sabendo que están construídas para transformar os feitos, a verdade. É así como non caemos nesas argumentación e chegamos a unha correcta interpretación. A mesma análise aplicamos a practicamente a totalidade da documentación xerada a raíz ou con posterioridade ao golpe, pois está, polo xeral, cargada de discursivas similares ou que responden a certos intereses. O cruce e contraste de datos entre diferentes fontes amosase fundamental, pois traballaremos con diferentes nomes asociados a identidades, filiacións e sucesos en diferentes tempos. Polo tanto, e sen ánimo de trazar traxectorias de vida completas de todos os protagonistas que amosaremos, si se é necesario ofrecer un perfil mínimo que nos permita identificalos e enmarcalos de certa forma, o que nos permite redondear a información que temos deles con anterioridade e posterioridade, se non a do mesmo momento nos que os analizamos e o contexto no que actúan. Neste sentido empregaremos os citados expedientes persoais de militares ou Gardas civís, pero tamén outro tipo de recursos como a prensa, a que resulta de moita utilidade á hora de realizar buscas grazas aos repositorios online cos que contamos. Será, grazas a estes, que podemos situar noutros contextos ás persoas que tratemos e completar así o seu perfil. O seguimento de persoas concretas que aparecen asociadas aos poderes golpistas foi de importancia para trazar algunhas destas traxectorias. A aproximación biobibliográfica resultou fundamental para reconstruír unha fisionomía colectiva no relativo á configuración deses poderes. Para isto foi necesario coñecer primeiro eses nomes cos que traballar, para posteriormente resolver os seus perfís a través do traballo non so coa documentación que se empregou no caso daqueles que contaban cun expediente oficial, se non a través da consulta doutro tipo de documentos, da bibliográfica e do coñecemento de realidades e dinámicas anteriores ao golpe. Fontes documentais e metodoloxía 37 Debido á natureza coa que presentamos toda esta disertación, o manexo doutros traballos de investigación realizados, monografías, artigos científicos, etc., resulta fundamental. Porque o que tentaremos contrastar son os feitos, o factual, fuxindo de apriorismos pero tamén de discursos creados xa coetaneamente, pero tamén posteriormente. Unha investigación doutoral establece, con frecuencia, o diálogo e debate coa bibliografía existente a fin de obter apoio para os seus argumentos e conclusións; tamén para facer o contrario e enriquecer así o debate. No noso caso, tamén nos teremos que enfrontar con certas afirmacións que se veñen herdando dende hai moito tempo, precisamente pola repetición do discurso que quedou escrito dende o mesmo ano 36, como pronto veremos. Constatado isto, a crítica sobre ese discurso será fundamental en todo momento, porque será unha das claves á hora de establecer as nosas conclusións: como enfrontalo e como ofrecer unha interpretación histórica crítica e real. Rafael García Ferreira 38 Estado da cuestión 39 Estado da cuestión As investigacións sobre golpe, guerra e ditadura son numerosas e presentan un amplo percorrido. Atenden a diferentes conceptos, formas de investigación e puntos de vista. A traxectoria dos estudos conta con ampla produción académica e rigorosa, pero tamén con versións revisionistas - e negacionistas- do pasado que se contrapoñen coas interpretación consensuadas por investigadores de recoñecida traxectoria e solvencia no manexo de fontes e na presentación de resultados que se adaptan á presentación obxectiva e axustada á realidade dos feitos. Sen ánimo de ser extensos ao respecto, faremos un repaso a través de estudos de relevancia e do estado actual da investigación con respecto ás cuestións que se tratan nesta disertación. Os primeiros textos sobre o golpe de Estado datan xa dos anos seguintes a que se executase, pero non os teremos en conta no nivel de presentación dun estado da cuestión. Como veremos cando os empreguemos -porque serán de utilidade a pesar de non nomealos aquí-, non son investigacións como tal, se non relatos sobre os sucesos, escritos dende unha clara posición de adhesión ao golpismo, que forman máis parte da proto-propaganda do réxime posterior que do conxunto de investigacións históricas. Servirían, iso si, como base para a interpretación dos feitos da historia oficial da ditadura, trasladándose o escrito en textos como o do sacerdote Manuel Silva Ferreiro para o caso galego, en 1938, a obras que abarcaban o conxunto de España e que tomarían forma posteriormente como a Historia de la Cruzada Española, de Joaquín Arrarás.13 Dende o exilio, en Buenos Aires, era publicada a visión do ocorrido dende o outro punto de vista, o das vítimas da violencia, coa saída de Lo que han hecho en Galicia, un volume que, ao igual que os anteriores, ten un valor relativo como fonte histórica, aínda que neste caso no sentido contrario a aqueles escritos dende a posición dos golpistas e do réxime franquista.14 Os primeiros estudos históricos sobre a guerra civil non marcadas pola liña do réxime viñeron da man de investigadores estranxeiros na década dos sesenta, como foi o caso de Hugh Thomas ou Stanley Payne, o deste referido ao estudo da Falanxe.15 Uns anos despois vería a luz tamén a primeira obra de Gabriel Jackson, reeditada ao igual que as anteriores en varias ocasións, e que se amosaba como pioneira tamén no estudo conxunto da República e a guerra civil, con interpretacións que a investigación ten precisado, tales como definir o golpe como «pronunciamento», e asumindo en ocasións o discurso golpista, como no referente a que o asasinato do líder monárquico José Calvo Sotelo precipitou a decisión de sublevarse contra o 13 Manuel Silva Ferreiro, Galicia y el movimiento nacional. Páginas históricas, Santiago de Compostela,
Compartilhar